Պլաստիկե բրնձի մասին լուրերը հերքվում են, հաստատվում՝ հավամթերքի շուկայում տոննաներով վտանգավոր մթերքի առկայության լուրերը: Թռչնամիս ներկրող բոլոր 16 ընկերությունները ստուգվել են:
Բրազիլական, ռուսական եւ ուկրաինական մի շարք ընկերություններից ներկրված հավի մսի կոնկրետ օրերի արտադրանքը ճանաչվել է վտանգավոր՝ սալմոնելայով, լիստերիայով վարակված:
Խախտում թույլ տված ընկերություններից ներկրումը այսուհետ կատարվելու է ուժեղացված լաբորատոր փորձաքննության ներքո՝ մանրամասնել է Սննդամթերքի անվտանգության ծառայության Սննդամթերքի անվտանգության և որակի հսկողության տեսչության պետ Վահե Դանիելյանը: Այժմ նաեւ տեղական թռչնամիսն է ուսումնասիրվում:
Պլաստիկե բրնձի հարցը մի տանտիկնոջ խոհանոցից դուրս եկավ, ողողեց համացանցը, մտահոգեց մարդկանց, ապա հասավ Սննդամթերքի անվտանգության պետական ծառայություն: Այստեղ արձագանքել են ու գնացել ոչ միայն բրնձի խմբաքանակի, այլեւ հատիկների հետեւից:
Իրացման կետում մնացած 3 կգ-ի կեսը բերել են լաբորատորիա, նմուշառել-փորձաքննել, այրել-հոտ են քաշել, եփել-համտեսել, զգայաբանական հետազոտություն կատարել՝ պատմում է ծառայության Սննդամթերքի անվտանգության և որակի հսկողության տեսչության պետ Վահե Դանիելյանը:
«Ինչեւէ, մենք բացառել ենք դրա սինթետիկ ծագումը: Ընդամենը բրինձը ցածրակարգ, կոտրատված բրինձ է, իսկ անվտանգության ցուցանիշներով բացարձակ անվտանգ է, ոչ մի պլաստիկի մասին մենք խոսել չենք կարող»:
Մինչ ծառայությունը մի կողմից փորձում է փարատել բրնձի հետ կապված մտահոգությունները, մյուս կողմից թռչնամսի շուկայում լաբորատոր փորձաքննությամբ հայտնաբերում են մանրէաբանական խախտումներ: Բրազիլական «Frangosul», «SEARA», ռուսական «Պրեմիում» եւ «Мироторг», ուկրաինական «Qualiko» ֆիրմայի հավամթերքի որոշ օրերի արտադրաքանակը վարակված է սալմոնելայով, լիստերիայով, վտանգավոր է և օգտագործման համար անպիտան:
Սննդամթերքի անվտանգության պետծառայությունը կարգադրել է տոննաներով վտանգավոր ճանաչված խմբաքանակների իրացումը կասեցնել, իրացման ցանցից հետ կանչել, ոչնչացնել: Արդյո՞ք վտանգավոր միս այլեւս չկա շուկայում. Դանիելյանը վստահ չէ, բայց շեշտում է՝ իր ընտանիքն էլ է խանութից միս գնում:
«Կազմակերպության անվանում, ապրանքանիշ, արտադրման ամսաթիվ, սա լրիվ բավարար է, որպեսզի քաղաքացին կարողանա նույնականացնել վտանգավոր մթերքը ու խուսափել դրանից»:
Վահե Դանիելյանը, սակայն, վրդովվում է «Ռադիոլուր»-ի դիտարկումից, թե հերթական անգամ իրենց ծառայությունը խնդիրն արձանագրում է միայն սպառողների շահերի պաշտպանների բողոքներից հետո, երբ վտանգավոր մթերքն արդեն հասել է իրացման ցանց ու մարդկանց խոհանոց:
«Ինձ թվում է՝ թյուր կարծիք է, որ ասում են՝ բոլորն իմանում են, իսկ ծառայությունը վերջում է իմանում: Երբ մենք 1200 պետական վերահսկողության միջոցառում ենք արել, 100-ից ավելի տնտեսվարողի գործունեություն ենք կանխել, դուք ինձ չեք կարող ցույց տալ գոնե 50 մարդու, որոնք դրա մասին մինչ այդ խոսում էին: Այս փաստը եզակի դեպք է»:
Վտանգավոր և օգտագործման համար ոչ պիտանի թռչնամիս՝ շուկայում
Նույն համատեքստում պարենային իրավունքի փորձագետ Դավիթ Պիպոյանը պնդում է՝ 2017-ը ցույց տվեց, որ մեր սահմանն առավել քան խոցելի է:
«Դա նշանակում է՝ մենք ունենք մաքսավոր, որը կարող է կաշառքով թողնել ադրբեջանական ծագման խնձոր, նշանակում է սահման, որը խոցելի է թուրքական լոլիկի առումով, նշանակում է պետական մարմիններ, որոնք հայտարարում են, որ տվյալ մթերքը հայաստան չի մտել, բայց ես, որպես գիտնական եւ որպես սպառող, հայտնաբերում եմ այդ մթերքը շուկայում: Խնդիրն այստեղ է»:
Վահե Դանիելյանը շեշտում է՝ 2018-ից մեր սահմանին մոնիթորինգի, վերահսկողության նոր, լուրջ մեխանիզմներ են ներդրվելու: Երկիր մտնող միրգ-բանջարեղենը եւ կենդանական մթերքը փորձաքննվելու են ծանր մետաղների, պեստիցիդների, ԳՄՕ-ների, հորմոնների մասով: ԵԱՏՄ շրջանակներում ռիսկերը կանխելու մասին են մտածելու:
«Ինչու ենք մենք նախատեսել, որ 2018-ից ներդրվեն մոնիթորինգային ծրագրեր: Մենք խնդրել ենք կառավարության համապատասխան միջոցներ հատկացնել, որպեսզի մենք կարողանանք դա անել»:
Դանիելյանի բնորոշմամբ՝ խիստ կարեւոր այս միջոցառումները դեռ եկող տարի են իրականացվելու: Ստացվում է՝ մինչ այժմ, երբ դրանք չեն իրականացվել, բոլոր այս ռիսկերն անարգել թափանցել են մեր շուկա։ Ստացվում է՝ սպառողների շահերի պաշտպանների արձագանքներն ու բողոքներն ավելի քան արդարացված են: