Արդյո՞ք իրական հիմք ունեն հայ ծնողներին անհանգստացնող տեղեկությունները, թե մանկապարտեզներում ու դպրոցներում առանց իրենց տեղեկացնելու պատվաստում են երեխաներին գրիպի դեմ:
«Ռադիոլուր»-ը գնացել է ծնողների մտահոգությունների հետքերով ու պարզել՝ որն է խնդիրը:
Վերջին օրերին ծնողների շրջանում անհանգստության անհասկանալի ալիք կա. շրջանառվում են տեղեկություններ, թե մանկապարտեզներում ու դպրոցներում երեխաներին պատվաստում են գրիպի դեմ՝ առանց դրա մասին ծնողներին կանխավ իրազեկելու կամ թույլտվություն հարցնելու:
«Ռադիոլուր»-ին ահազանգած ծնողը ներկայանալ չի ցանկանում, սակայն ֆեյսբուքով փոխանցում է իրեն հասած խոսակցություններն ու իր անհանգստությունը:
«Տարբեր մարդիկ ինձ հարցնում էին՝ արդյո՞ք տղայիս պատվաստել են դպրոցում: Այսօր ևս մի քանի հոգու հետ խոսեցի, իրենց երեխաներին էլ մանկապարտեզում ասել են՝ պարտադիր պիտի պատվաստվեն, այլապես չեն թողնի դպրոց կամ պարտեզ գնալ: Մեր դպրոցում նման խոսակցություն չկա, սակայն ես անհանգստանում եմ, քանի որ իմ տղան շատ ալերգիկ է»:
Մտահոգ ծնողը շտապել է պարզաբանում ստանալ առողջապահության նախարարությունից: Գրավոր հարցմանը՝ ոչ մի պատասխան: Կոնկրետ ո՞ր մանկապարտեզում կամ դպրոցում է շրջանառվում նման խոսակցություն: Մեզ դիմած ծնողը հրաժարվում է պատասխանել, փոխարենը փոխանցում՝ մանկապարտեզում հորդորել են չհրաժարվել պատվաստումից, «եթե մի տեղ ասեք՝ մեզ համար լավ չի լինի, թող պատվաստվեն, ձեր երեխայի համար է»,-ասել են:
Որքանո՞վ են հավաստի եւ տրամաբանական այս խոսակցությունները: «Ռադիոլուր»-ը պարզաբանում ստացավ առողջապահության նախարարության Իմունականխարգելման ազգային ծրագրի ղեկավար Գայանե Սահակյանից: Պատասխանը միանշանակ էր ու սպասելի՝ նման բան չկա ու չի կարող լինել:
« Սա իրականությանը չի համապատասխանում: Մենք ոչ մանկապարտեզներում, ոչ դպրոցներում գրիպի դեմ պատվաստում չենք անում: Պատվաստանյութը տրամադրված է պոլիկլինիկաներին, եւ պոլիկլինիկաներն են առաջարկում ծնողներին՝ բերել, պատվաստել»:
Նման հանձնարարական առողջապահության նախարարությունից պոլիկլինիկաներ չի գնացել, իսկ պոլիկլինիկաներն իրենք նման քայլ ձեռնարկել չէին կարող՝ հայտարարում է Իմունականխարգելման ազգային ծրագրի ղեկավարը: Գայանե Սահակյանը վրդովվում է անփույթ կերպով ապատեղեկատվության տարածումից:
Գրիպի դեմ պատվաստումը համատարած չի առաջարկվում բնակչությանը: Ռիսկի խմբի մեջ մտնող մարդիկ կարող են դիմել բնակչության վայրի պոլիկլինիկա եւ գրիպի դեմ անվճար պատվաստում ստանալ: Ռիսկի խմբում են տարեցները, հղիները, բուժաշխատողները, քրոնիկ հիվանդություն ունեցողները եւ երեխաները, մարդիկ, ովքեր համաճարակային վիճակում առավել խոցելի են: