«Վասպուրական» հայրենակցական միությունը տանիք է վանեցիների ժառանգների համար: Միության ավելի քան 2000 անդամները միահամուռ ուժերով շարունակում են իրենց նախնիների ավանդույթները: «Արծիվ Վասպուրականի» հուշակոթողը կառուցվել է 1980-ականներին ու դարձել սրբատեղի վանեցիների համար: Այսօր հուշակոթողը ոչ բարեկարգ վիճակում է, սակայն միության նախագահ Գագիկ Բաղդասարյանի նախաձեռնությամբ սկսվել են հուշակոթողի և դրա հարակից տարածքի բարեկարգման և վերակառուցման աշխատանքները:
27 տարի առաջ հիմնվեց «Վասպուրական» հայրենակցական միությունը։ Արդեն մեկ դարից ավելի Հայաստանի արևելյան մասում ապրող վանեցիների ժառանգների կողմից: Հայրենակցական միության նպատակն է վառ պահել Վան-Վասպուրականի հիշողությունը, պատմական հայրենիքից անբաժան լինելու զգացողությունն ու երկրին տեր մնալու գաղափարը։
Վանեցիների ժառանգներին միավորողը «Արծիվ Վասպուրականի» հուշակոթողն է՝ կառուցված արմատներով վանեցի ճարտարապետ Ջիմ Թորոսյանի նախագծով: Հուշակոթողի պահպանությունն ու խնամքը յուրաքանչյուրիս պարտքն է՝ ասում է միության նախագահ Գագիկ Բաղդասարյանը:
Աշտարակ-Թալին մայրուղու հարևանությամբ գտնվող հուշարձանի բարեկարգման աշխատանքներն սկսվել են այս տարվա սեպտեմբերին։ Հետագայում նախատեսվում է հուշարձանի տարածքում կառուցել թանգարան, տնկել ծառեր ու դարձնել այդ տարածքը ուխտատեղի ոչ միայն վանեցիների, այլև ողջ հայության համար: