Լուսինե Ավանեսյան
«Ռադիոլուր»
Հայաստանի հանրային Ռադիոյի եւ Արցախի հանրային ռադիոյի գործընկերային բարեկամությունը տասնամյակների պատմություն ունի: Այսօր Ստեփանակերտում այն խորացնելու հեռանկարն ու քայլերն են քննարկվել: Արցախում է Հայաստանի հանրային ռադիոյի տնօրեն Մարկ Գրիգորյանը: Հանդիպումներից մեկը Ստեփանակերտի «Արմատներ» կենսակենտրոնում էր:
Հայաստանի եւ Արցախի հանրային ռադիոընկերությունները վաղեմի բարեկամներ են: Արցախում լավ են հիշում խորհրդային տարիները, երբ մարզային ռադիոն հանդիսանալով հայկական խոսքը մարդկանց բերող միակ եթերային լրատվամիջոցը իր թիկունքում ուներ Հայկական ռադիոյի բացահայտ ու թաքուն աջակցությունը: Հարուստ ձայնադարանը, որ ստեղծվեց այդ տարիներին, ցավոք ոչնչացավ պատերազմի օրերին եւ նույն աշխատանքը ռադոականները ստիպված սկսեցին կատարել երկրորդ անգամ, այդ հարցում կրկին ունենալով Հայաստանի հանրային ռադիոյի աջակցությունը: Արցախի հանրային հեռուստառադիոընկերության խորհրդի նախագահ Նորեկ Գասպարյանը Հանրային ռադիոյի գործադիր տնօրեն Մարկ Գրիգորյանի հետ հանդիպումից հետո «Ռադիոլուր»-ին ասաց, որ քննարկում են նաեւ համատեղ նոր նախագծեր՝ մասնավորապես ռադիոկամուրջներ եւ հաղորդաշարեր ստեծելու առումով:
Երկու ռադիոընկերությունների համար խնդիր է ՖՄ տիրույթում հեռարձակման հարցը. սեփական հաճախականություն Արցախի հանրայինը չունի եւ օրական հինգ ժամ օգտագործում է Հայաստանի հանրային ռադիոյի հաճախականությունը:
Նորեկ Գասպարյաի խոսքով, նոր եթերաշրջանում Հայաստանի հանրային ռադիոյի որոշ հաղորդումներ միաժամանակյա կլինեն նաեւ Արցախի ռադիոյի եթերում:
Հայաստանի հանրային ռադիոյի տնօրենը Արցախի հանրայիում գործնական հանդիպումից բացի Ստեփանակերտի «Արմատներ» նորաբաց կենսակենտրոնում հանդիպեց գործող եւ ապագա լրագրողների հետ: Զրույցը լրագրության նրբությունների, սոցիալական ցանցերի օգտագործման առանձնահատկությունների շուրջ էր:
Հանդիպման նախաձեռնող Սարինե Հայրիյանն անկեղծանում է՝ ավելի ակտիվ ու մասնագիտական զրույց էր ակնկալում:
Իրինա Հայրապետյանը Արցախի պետհամլսարանի լրագրության բաժնի ուսանող է, նրա հարցն արժանացավ Մարկ Գրիգորյանի հատուկ մրցանակին՝ Հանրային ռադիոյի լոգոյով գրչի եւ նոթատետրի: