Անի Մինասյան
«Ռադիոլուր»
Շինարարներն այսօր նշում են իրենց մասնագիտական տոնը: Օրվա առիթով կազմակերպված միջոցառմանը շքանշաններով ու պատվոգրերով են պարգևատրվել ոլորտում ավանդ ներդրած մասնագետներն ու ընկերությունների ղեկավարները: Միջոցառմանը մասնակցել են նաև կառավարության ղեկավարն ու Երևանի քաղաքապետը: Որքան էլ վիճակագրական տվյալները հուշեն, թե շինարարության ոլորտն այժմ դժվարին փուլում է, մեկ բան ակնհայտ է՝ հայ շինարարը միշտ կառուցել է և պիտի կառուցի. այդպես է եղել անգամ մեր երկրի համար չափազանց դժվարին ժամանակներում՝ ասել է Կարեն Կարապետյանը:
Շինարարի մասնագիտությունը սովորաբար նույնացվում է տղամարդկանց հետ, բայց այս ոլորտում ոսկե մեդալներ են ստանում նաև կանայք:
Մարինե Չատինյանը միակ շինարարն էր , որ միջոցառումից հեռանում էր ոչ միայն ոսկե մեդալով, այլ նաև ծաղկեփնջով: Ասում է՝ հուզված եմ, շնորհակալ ու նաև շատ ոգևորված: Ցանկանում է, որ շինարարների համար ստեղծվեն աշխատանքի ավելի լավ պայմաններ:
Կազմ-պատրաստ՝ տոնական տրամադրությամբ: Երկար տարիների աշխատանքային փորձ ունեցող Համլետ Հակոբյանը նույնպես մասնակցում է մասնագիտական տոնի առիթով կազմակերպված միջոցառմանը: Ոսկե մեդալ, շնորհակալագիր, շքանշան ստացողների թվում չէ, սակայն քաջատեղյակ է շինարարական խնդիրներին: Կես կատակ կես լուրջ ասում է՝ այդքան էլ շատ շինարար չեմ: Երկար տարիների շինարարական աշխատանքից հետո փոխել է ոլորտն ու այժմ զբաղվում է ջերմամեկուսացման խնդիրներով: Շինարարին, ասում է, այսօր պակասում են աշխատանքի ծավալները:
Շինարարներին շնորհավորելու էր եկել նաև վարչապետը: Որքան էլ վիճակագրական տվյալները հուշեն, թե շինարարության ոլորտն այժմ դժվարին փուլում է, մեկ բան ակնհայտ է՝ հայ շինարարը միշտ կառուցել է և պիտի կառուցի՝ ասում է վարչապետը:
Մինչև 2008 թվականը մեր երկրի տնտեսության հիմնասյուներից մեկը շինարարության ոլորտն էր: 2009-ից ոլորտում անկում է գրանցվում:
2016 թվականին, օրինակ, 2015 թվականի համեմատ շինարարության համախառն ծավալը կրճատվել է շուրջ 10%-ով: 2014 –ին գրանցվել է 4% անկում, 2013 թվականին՝ 8%:
Վարչապետը վստահ է սակայն, որ տարվա կտրվածքով ոլորտն աճ է գրանցելու: Իր վստահությունը փորձում է փոխանցել նաև շինարարներին
Խնդիրներ կան ցանկացած ոլորտում, ասում է Հայաստանի Շինարարների միության նախագահ Գագիկ Գալստյանը և ավելացնում՝ ինչպես ընտանիքում միահամուռ ուժերով փորձում ենք լուծել մեր խնդիրները:
Քաղաքաշինության ոլորտում ներդրած նշանակալի ավանդի համար և Շինարարի օրվա կապակցությամբ ՀՀ վարչապետի հուշամեդալով պարգևատրվեցին մի շարք շինարարաներ, շինարարական ընկերությունների ղեկավարներ: Հուշամեդալներ հանձնեց նաև Երևանի քաղաքապետ Տարոն Մարգարյանը: