Կառավարության այսօրվա նիստի ժամանակ ՀՀ պաշտպանության նախարար Վիգեն Սարգսյանը տեղեկացրել է, որ երեկ տեղի է ունեցել սահմանամերձ համայնքների միջգերատեսչական հանձնաժողովի նիստը, հնչել են ՀՀ նախագահի երկու հանձնարարականները Կրթության և գիտության նախարարությանը:
Վիգեն Սարգսյանը պարզաբանել է, որ հանձնարարականներից մեկը վերաբերում է համայնքների աշակերտների բոլոր դասագրքերի փոխհատուցման խնդրի լուծմանը, և մյուսը՝ սահմանամերձ համայնքներից ուսանողների ուսման վարձերի հատուկ մեխանիզմի ներդրմանը։
ՀՀ Պաշտպանության նախարարը նշել է, որ երկու հանձնարարականի վերաբերյալ էլ կրթության և գիտության նախարարի տեղակալը երեկ զեկուցել է, որ պատրաստ են դրանց իրականացմանը:
«Եթե մենք դա շատ արագ չանենք, ուղղակի չենք հասցնելու,- ասել է Վիգեն Սարգսյանը՝ հավելելով,- դրանք երկուսն էլ կառավարության որոշումներ են պահանջելու, և ցանկալի է դա անել հիմա՝ մինչև սեպտեմբերի մեկը, դասագրքերի առումով՝ անպայման, երկրորդը՝ գոնե իրազեկման առումով»։
Դիմելով վարչապետին եւ կառավարության անդամներին՝ Վիգեն Սարգսյանն առաջարկել է հանձնարարականի մեջ նշված հարցերն էլ ներառել։ Սրան հետեւել է վարչապետի դրական պատասխանը։